"ضربة الشمس Heat stroke"
هنتكلم النهاردة عن واحدة من أهم الحالات اللي بتصيب الحيوانات الأليفة بشكل كبير وبتحتاج تدخل بسيط وسريع وهي "ضربة الشمس Heat stroke"
في الأول لازم نعرف ان المسئول عن توازن درجة حرارة الجسم هو الـ thermoregulatory center الموجود في الفص الأمامي من الغدة النخامية anterior hypothalamus وبناءا على كدة الجسم بيفقد أو يكتسب حرارة بطرق مختلفة على حسب الوضع المحيط والحالة الصحية لحد ما يوصل للـ normal setpoint.
سبب حدوث ضربة الشمس Heat stroke :
ببساطة الحيوان بيتصاب نتيجة التعرض لمكان درجة حرارته عالية لفترة طويلة وأشهر الأماكن دي هي العربيات خصوصا في فصل الصيف بينتج عن كدة زيادة معدل اكتساب الحرارة عن معدل الفقد فيبدأ الجسم يسخن وتبان عليه الأعراض.
وفيه سلالات معرضة للإصابة بضربات الشمس اكتر من غيرها زي السلالات ذات الشعر الكثيف زي كلب الراعي الألماني والقطط الشيرازي.
الأعراض المبكرة:-
- اللهث (panting) وممكن يبقي بسيط او قوي حسب درجه تفاقم ضربه الشمس
- الحيوان فارد جسمه على الأرض عشان يقلل درجة حرارته
- انفعال وعطش شديد
- سيلان لعاب سميك وشحوب اللثة
- زيادة ضربات القلب وفيه حالات بتوصل للقئ والإسهال
- لو شديت الجلد بالراحة من عند الرقبة ميرجعش لوضعه الطبيعي بسبب الجفاف
الأعراض المتقدمة تستدعي التدخل السريع:-
- الإرهاق والضعف وأليفك مش مهتم بأوامرك ولا بأي مغريات كان مهتم بيها قبل كده
- احمرار اللثة وممكن تتحول للون الأزرق
- الانهيار وفقدان الوعي
- ونوبات الصرع
للاسف الحيوانات مش بتقدر تخفف عن نفسها أو تتجنب الشمس و تتنقل لمكان اكثر بروده أو تنظم درجه حراره جسمها بالعرق زينا فلازم نتدخل حفاظا علي حياتهم
الاسعافات الأولية:-
أول حاجة لازم تبعده عن مصدر الحرارة لمكان بارد وتبدأ تحط قدامه ماية وممكن تبدأ تبرد جسمه بقماشة فيها ماية وده لغاية ماتروح لدكتور بيطري عشان لو الحالة متدهورة يقدر ياخد الإجراءات المناسبة
من الغلطات الشائعة استخدام الماء المثلج او البارد على جسم الحيوان ده بيسبب انكماش وضيق في الأوعية الدموية لجسم الحيوان وده هيأثر بالتبعية على فقده للحرارة استخدام خوافض الحرارة بدون استشارة من الطبيب المختص
الوقاية:-
- وجود مصدر متجدد وكافي من المياه البارده للكلب بعيدا عن الشمس
- توفير الاسقف العاليه على الاقل ارتفاع مترين وتكون معزول بشكل يحمي الكلب اسفلها من الحراره
- توفير مراوح للتهويه
- حلاقة الشعر الكثيف للكلاب طويلة الشعر
معلومتنا النهاردة بتقول:
مينفعش تستخدم خافض حرارة في حالات ضربات الشمس والسبب أن التأثير مش على الـ thermoregulatory center ولكن فيه خلل في التوازن بين فقد واكتساب الحرارة.