اكتئاب الحيوانات
تعالوا نعرف القصة كاملة بدأت ازاي :
بيدّعي مدرب الدلافين "Ric O'Barry" إن حصلت حاجة غريبة معاه وهو إن الدولفين اللي بيدربه نط من المياه وانتحر بين ايدين "O'Barry"!
يا تري ايه هي الاسباب اللي ممكن تدخل الحيوان في اكتئاب شديد وممكن يوصل للموت
احب اقولك عزيزي القارئ أن الحيوانات بتمشي بالغريزه مش التفكير ومن أسباب اكتئابهم
الفقد :
الحيوانات اللي عندها وفاء شديد لصاحبها لو توفي أو سافر وغاب عنها لمده بتدخل في حاله اكتئاب شديدة مثلا Gernot Wieland واحد من الـ Speakers في TEDx كان بيحكي عن اكتئاب الحيوانات، ومن ضمن القصص اللي حكاها، قصة زميله في المدرسة اللي كان بياخد كلبه الجيرمن شيبرد معاه في كل مكان، وبعد شهور زميله انتحر بحبوب منومة، والكلب كان له نفس المصير.
تغير بيئة الحيوان اللي كان عايش فيها :
وفيه دراسه بتقول إن نسبة الاكتئاب عند الحيوانات المفترسة أقل بكتير من الحيوانات الأليفة وده سببه انهم بيعيشوا على طبيعتهم في البيئة الخاصة بيهم، وإن الحيوانات الأليفة بتُصاب بالاكتئاب معظم الوقت بسبب تغيير البيئة أو الظروف المحيطة وتأثيرها عليها، زي شعورها إنها محبوسة في قفص ومُقيدة.
الانتقال :
ممكن الانتقال من بيت لبيت أو من مكان لمكان يسبب حاله من الاكتئاب لحيوانك الاليف وخصوصا القطط اللي بتصاب بالاكتئاب برضوا لكن مش بنفس الدرجة اللي بتصاب بيها الكلاب، لا نها حيوانات بيتوتتيه شوية بطبيعتها وما بتحبش تغيَّر مكانها أو تدّخل عليها حد غريب عنها
بس هل الحيوانات بتتعمد الانتحار؟ هل بتختار انها تقتل نفسها؟
بيجاوبنا دكتور محمود حمدي -أخصائي طب وجراحة الحيوان- إن مفيش حاجة اسمها "انتحار الحيوانات" بالمسمى الحرفي، أو مفيش كلب بيوصل نفسه للانتحار عن عمد، ولكنه بيحس بالاكتئاب والحزن والنتيجة بتكون خارجة عن إرادته.
اعراض الاكتئاب عند الحيوانات هي نفس الاعراض عند البشر. لكن فيه طرق كتير نعرف بيها إذا كان الشخص مكتئب، أبسطهم إنه يقولنا أنا مش بخير، لكن الحيوانات معندهاش الخيار ده، وده مش مبرر إنها لا تشعر بالحزن والاكتئاب.
طب إيه أعراض الحزن والاكتئاب اللي ممكن تظهر على الحيوان؟!
1- تغيرات الشهية وفقدان الاهتمام بالطعام وغالبًا بيصاحبها فقدان الوزن.
2- النوم لفترات طويلة وقلة التفاعل مع المؤثرات الخارجية والتواصل مع الأونر
3- فقدان الاهتمام بالأشياء الممتعة زي اللعب
4- التجنب والاختباء
اما العلاج ف بيتلخص في نقطتين :
- تغيرات في السلوك والبيئة المحيطة زي زيادة الأفعال اللي الحيوان بيحبها وتشجيعه عليها ومكافئته على السلوكيات الإيجابية وزيادة فترات التدريب واللعب معاه وكمان ممكن تجيب حيوان جديد معاه عشان ميحسش انه لوحده، واوقات الاكتئاب بيكون سببه تشخيص غلط لبعض الأمراض أو نقص في مستويات السكر في الدم ف لازم الفحص الدوري والعناية بالوجبات وتقسيمها على فترات متساوية، وممكن تضيف Omega 3 للأكل لأنها مفيدة للمخ وبالتالي هتحسن المزاج.
- العلاج بالأدوية وفي الحقيقة الأدوية المستخدمة في علاج الاكتئاب في البشر ممكن تستخدم في علاج الاكتئاب في القطط والكلاب زي الـ Fluoxetine اللي بيمنع الـ Re-uptake اللي بيحصل للـ Serotonin في الـ Presynaptic serotonin neurons وبالتالي يفضل فترة أطول ف الجسم ويزيد الشعور بالسعادة وتبدأ الحالة تتحسن بالتدريج بعد استخدام الدوا بأربع أسابيع.
المصادر :
- Can animals get depressed too? (zmescience.com)
- How Pets Help Manage Depression (webmd.com)
- 10 Effective Ways to Treat Dog Depression - The Dogington Post
- Depression in Dogs: Symptoms, Causes, Treatments, and More (webmd.com)
- Prozac for dogs: What you need to know about medicating your pet (singlecare.com)
- Fluoxetine - StatPearls - NCBI Bookshelf (nih.gov)