التلقيح الصناعي
 |
هنتكلم عن عملية مهمة جدا بتتم في الحيوانات وخصوصا الابقار والجاموس وهيا التلقيح الصناعي
طيب مبدئيا كدة يعني ايه تلقيح صناعي
دي عملية بنحصل منها علي السائل المنوي للميل بطريقة آلية وبعدين بيتم تخفيفه وبيتحفظ مبرد عند درجة 5 م ومجمد عند - 79 م او - 196 م لحين وضعه في رحم الاناث فبيحصل الاخصاب.
طب تعالوا كدة نشوف ونعدد مزايا التلقيح الصناعي
1-بنستفيد اكتر من الطلائق الممتازة اللي كفائتها الوراثية عالية في انتاج اللبن واللحم.
2- عدد الاناث اللي بيتم تلقيحها صناعي بيزيد بيوصل من 10-20 الف انثي بيتم تلقيحها من الذكر الواحد دا في التلقيح الصناعي في حين انه بيقوم بتلقيح من 50-60 انثي في التلقيح الطبيعي
3-الاستغناء عن تربية طلوقة خاصة عند كل مربي وبالتالي هنوفر تكاليف رعاية الطلوقة وكذلك المساعدة في تنظيف برنامج التربية وتقصير الفترة في الولادات.
4-بيوفر علي المربي البحث عن طلائق ممتازة كل فترة لتجنب التربية الداخلية.
5-بيفيد في عملية الخلط ما بين الحيوانات وبالتالي الحصول علي قوة الهجين ودا بيتم من خلال نقل السائل المنوي بين البلاد المختلفة.
6-بيقلل من نشر الامراض ودا لو التلقيح الصناعي تم تحت ظروف صحية وبواسطة خبير متدرب .
7-التغلب علي الفروق الطبيعية بين الذكر والانثي وبين السلالات المختلفة.
8- بيزود معدل الخصوبة بزيادة نسبة الحمل.
9- بيخلينا نستفيد من الطلائق كبيرة السن والزايدة في والوزن اللي لا تستطيع الوثب ودا باستخدام السائل المنوي المجمد المحفوظ.
10- بيوفر مقادير من اللحوم ودا نتيجة التخلص من فائض الطلائق المستعملة في التلقيح الطبيعي.
12-اتاحة الفرصة للدراسات والابحاث المتعلقة بالتربية واختبار القطعان والتحسين الوراثي ودا اللي مابنعرفش نطبقه باستخدام التلقيح الطبيعي.
وكدة خلصنا المزايا وطبعا زي ماكل حاجة ليها مميزات ليها كمان عيوب
طب ايه هيا عيوب التلقيح الصناعي
1 - الاهمال في اجراء عملية التلقيح وخاصة استخدام ادوات غير معقمه ودا بيعرض الاناث لبعض الامراض
زي التهاب المهبل وعنق الرحم.
2- قلة عدد الطلائق المستعملة بيدفع المربي للتلقيح بسائل منوي لطلائق متوفرة ودا مابيكونش مطلوب لبرنامج تربية
3-انه ممكن يكون موضوع مكلف وبيشكل عبئ علي المربي.
5-حجز الحيوانات في الحظائر عشان التليقح دا بيقلل كمية اللبن
طب ازاي اختار طلوقة التلقيح الصناعي
عملية الاختيار مش عملية سهلة خالص لأنها بتبدأ من الولادة و لحد استخدام الطلوقة في عملية التلقيح الصناعي.
ودا بيحصل باختيار العجول الذكور المناسبة بمواصفات معينة لحد مايوصل لعمر سنة ونص ولازم نختاره علي اساس الشكل الظاهري للمواصفات اللي هنقولها دلوقتي
أول حاجة تناسق الجسم وظهور علامات الذكورة والقوة.
الراس كبير ومش مسحوبة لقدام زي رأس الفيميل.
الرقبة مرفوعة لاعلي وغليظة وقوية ومفيهاش ثنايا علي الجلد اللي حوالين الرقبة.
الارجل الامامية قوية وعمودية علي سطح الارض.
وعند عمر 15 ل 18 شهر نبدا في تدريب الذكور علي الانقياد وعملية الوثب وجمع السائل المنوي لفحصه مبدئياً لاجراء التقييم الاول للسائل المنوي وتسجيل الاختبارات وتميزه برقم معدني او بلاستيك مع الوشم.
علي نفس المنوال ده هنوصل لإية الاعتبارات لاختيار طلوقة التلقيح الصناعي :
١- فحص الجهاز التناسلي ؛ عشان الطبيب البيطري يتأكد من سلامة اجزائه والغدد اللي متصلة بيه .
٢- فحص الخصيتين : بحيث لازم يكونوا قد بعض ومتدليين في الوضع الطبيعي و مش صلبين ولا فيهم ورم او التصاق مع كيس الصفن ولا الجلد عليهم لونه اسود .
٣- عند الوثب بيُلاحظ استقامة وانتصاب القضيب وطوله المناسب .
٤- ارتفاع الرغبة الجنسية + ملاحظة سرعة الوثب والقذف وانا بجمع السائل المنوي.
طيب هجمع السائل المنوي ازاي
١- طريقة مباشرة عن طريق جمعه من مهبل الأنثي بعد وثب الطلوقة عليها بإسفنجة .
٢- وضع أكياس مطاط في المهبل ، بحيث ان الطلوقة يقذف فيها
٣- عن طريق تدليك البروستاتا والجهاز التناسلي الداخلي ، او استخدام قسطرة من الوعاء الناقل و الحويصلات المنوية .
٤- استخدام المهبل الصناعي .
٥- استخدام التنبيه الكهربي .
هختبر خصوبة الطلوقة اللي انا اختارته ازاي
الطريقة الاولي ( المباشرة ) عن طريق اختبار السائل المنوي له بالعين المجردة و تحت الميكروسكوب بشوف لونه ، حجمه ، تموجاته، الحي والميت من الحيوانات المنوية .
الطريقة التانية (الغير مباشرة) اختبار عدم عودة الابقار للتلقيح بعد ٣٠،٦٠،٩٠ ، وفيها بيتم مقارنة عدد الأبقار أو الجاموس اللي تم تلقيحه و لم يعد للشياع بالنسبة للعدد الكلي للحيوانات اللي اتلقحت.
و اية الاحتياطات اللي المفروض أراعيها وأنا بعمل التلقيح الصناعي
١- مخوفش الحيوان أو ازعجه ساعت التلقيح ، ولازم الملقح يكون هادي ومبيستخدمش العنف .
٢- الزناقة اللي خاصة بالتلقيح لازم تبقي قريبة من مكان الحيوانات الطبيعي ، عشان متنزعجش من فكرة انها بتتاخد بعيد عن مكانها .
٣- المسح علي الحيوان وتدليك فتحة المستقيم عشان يحس بالأمان ويقف في هدوء .
٤- التأكد ان جميع أدوات التلقيح خاصة القسطرة نضيفة ومعقمة و كمان لبس الملقح كله .
واخيرًا اية الاعتبارات الهامة اللي المفروض اراعيها عشان التلقيح الصناعي ينجح
١- أرعي الطلوقة اللي معايا كويس عشان أحصل علي سائل منوي جيد ، وابعده عن فكرة التعرض للضعف او الاجهاد الجنسي او الامراض .
٢- اختيار الطلوقة الممتاز وراثيا عشان أوصل لاعلي معدلات تحسين وراثي .
٣- إعداد كوادر فنية اللي هتقوم بجمع السائل المنوي .
٤- استخدام الطرق الحديثة في معرفة الشياع
٥- فحص الاناث لمعرفة شياعها و جسها عشان لو حصل حمل متتلقحش مرة تانية ويحصل اجهاض
٦- توفير مصدر دائم للنيتروجين المسال عشان أحفظ فيه السائل المنوي المجمد
٧- فتح سجلات لتسجيل جميع البيانات و لتحسين النسل فيما بعد .