قياس الحراره في الحيوانات  

 ازاي اعرف درجة الحرارة طبيعيه ولا لا واقيس الحراره منين و شوية تحذيرات ونصائح ليكم 

طيب هو انا إزاي اعرف إن درجة حرارته عالية ولا واطية يعني المعدل الطبيعي بيكون من كام لكام؟! 

هقولك إن المعدل الطبيعي لدرجة الحرارة بيختلف من الكلاب للقطط 

ف هتلاقي إن المعدل الطبيعي للكلاب بيكون من 37.9 إلى 39.9 درجة مئوية

والمعدل الطبيعي في القطط بيكون من 38.1 إلى 39.9 درجة مئوية

لو درجة الحرارة زادت او نقصت عن كدا ف دا مؤشر على إن صحة الحيوان مش كويسة، و بعد ما تتأكد إن الحيوان مريض ف لازم تقيس درجة حرارته مرتين كل يوم مره ف الصبح و مره بالليل

طيب درجة الحرارة بتتقاس منين و إزاي؟!

تقدر تقيس درجة حرارة الحيوان من مكانين

1- من خلال المستقيم ( فتحة الشرج ).

2- من خلال ودانه.

طيب عرفنا منين بتتقاس درجة الحرارة،  إزاي هقيسها دلوقتي؟!

اولا: لو هتقيس درجة الحرارة من فتحة الشرج ف إنت هتتبع السبعة خطوات دي:

لازم تكون مجهز الترمومتر اللي هتقيس بيه و دا عن طريق رجه كويس اذا كان الترمومتر بيحتوي على زئبق، أما اذا كنت بتستخدم ترمومتر ديجتال ف غالبا بعطي النتيجة أسرع، و يُنصح بإستعمال غطا الترمومتر الديجيتال مره واحدة.

ادهن الترمومتر بكريم بترولي أو أي كريم مزلق مائي، زي الفازلين او كريم كي واي، 

طيب إحنا بنعمل كدا ليه؟! عشان تخفف من الضغط على الحيوان بقدر الإمكان، لأن استعمال المزلق دا بيساعد على تقليل خطر الخدش او التمزق او الثقب.

هتبدأ تمسك الحيوان بالطريقة الصحيحة واللي هتساعدك بإنك تقيس درجة الحرارة كويس، طيب هتمسكه إزاي؟! 

بتختلف الوضعية الصحيحه من القطط للكلاب 

في القطط: هتكون ماسك القطة تحت ذراعك زي الكرة كدا ويكون ذيلها قدام جسمك، و رجليها تكون على سطح صلب زي الطرابيزة مثلا⁦

ممكن تسيطر عليها اكثر وانت ماسكها ف ممكن تمسكها من مؤخرة العنق( بيكون كدا زي جلد زايد في المنطقة دي ) لأن القطط بتربط دي الحركة بحماية الأم ف ممكن يكون ليها تأثير مهدء بسيط، وممكن تخلي حد يساعدك ويمسكلك القطة وانت تقيس بس عشان القطة هنا بتكون مش مرتاحة وهتفضل تتحرك وتتلوا كتير.

في الكلاب: هنا انت اكيد هتحتاج حد يساعد ويمسكلك أياديه ورجليه ويثبتهم على الطرابيزة، وهترفع ذيله وتبدأ تقيس،و ممكن تقيس درجة الحرارة وهوا نايم على جنب عشان الوضعية دي بتريح العميل أكثر ( لو كان العميل مالوش خبرة ف الموضوع دا )، لاكن لو كان ليه خبرة ف الأحسن إنك تقيس والكلب واقف.

هتمسك الترمومتر بزاوية 90 درجة.

ماتدخلوش بميل عشان دا هيسبب زيادة ألم وإمكانية إزعاج الحيوان، وتبدأ تدخل الترمومتر في فتحة الشرج لمسافة 2.54 سنتيمتر بس إنتبه تدخل الترمومتر اكتر من كدا.

ثبت الترمومتر في المكان حوالي دقيقتين لو كان الترمومتر دا زئبقي، لاكن لو الترمومتر كان ديجيتال ف هو غالبا بيصفر أول ما النتيجة تطلع، وفي المرحلة دي تأكد إنك ماسك الحيوان كويس عشان هتتلوى كتير وممكن تخربشك او تعضك، اعمل كل حاجة تقدر عليها ف إنك تخلي الحيوان ثابت عشان تتجنب الإصابة إنت والحيوان.

هتقرأ النتيجة وتعرف هل المعدل طبيعي ولا لا، زي ماشرحناه فوق.

هتنظف الترمومتر كويس و دا عن طريق استعمال ماء دافئ وصابون أو كحول محضمر لشطف الترمومتر ومسحه، لازم يكون معقم كويس جدا قبل م ترجعه مكانه

ثانيا: لو هتقيس درجة الحرارة من إذن الحيوان ف انت هتتبع الأربعة خطوات الجايين:

‏

هتستعمل ترمومتر خاص بالإذن بس يعني غير الترمومتر الشرجي، و ترمومتر الإذن بيكون أطول من الترمومتر الشرجي عشان توصل لقناة الإذن بسهولة أكبر، و ترمومتر الإذن دا مش بكفاءة الترمومتر الشرجي، لاكن هتضطر تستعمله لو الحيوان مشاكس جدا و مش راضي يثبت.

هتمسك الحيوان بقوة وتثبت رجليه ويدهه على سطح صلب زي الأرض او الطرابيزة، وتأكد إنك ماسك رأس القطة تحت ذراعك كويس جدا، عشان لو حركت رأسها او شدته هيكون خطر عليها.⁦

هتدخل الترمومتر في إذن الحيوان بس براحة وتركيز وعمق.

هتنظف الترمومتر كويس جدا بنفس طريقة التنظيف اللي ذكرناها في الترمومتر الشرجي.

وطبعا زي ما وعدتك هقولك على كام تحذير صغير كدا:

* متحاولش ابدا تدي الحيوان أي أدوية لخفض درجة الحرارة غير لما تستشير الطبيب البيطري.

* متعملش أي حمامات إسفنجية لتخفيف السُخونية

* من الأفضل إنك لما تقيس درجة الحرارة في أول مرة، إنك تقيس درجة الحرارة الشرجية والأذنية مع بعض، عشان تتأكد من دقة الترمومتر الأذني يعني لو نتيجة الترمومتر الأذني كانت نفس او قريبة من نتيجة الترمومتر الشرجي اعرف إن الترمومتر الأذني شغال كويس. 

ونصيحة ليك يا دكتور لو جاتلك الحالة وهيا خايفة حاول تعمل أي حاجة عشان تهدي من خوفها

* ناديها بإسمها.

* كافئها او اعطيها أي حاجة هي بتحبها وناديها كتير بإسمها⁦.

* و أثناء القياس إستخدم كلمات "شفاء!"، "ميزان حرارة!"، "قياس مهم"، الكلمات دي ممكن لما تسمعها الحالة تقعد وتستنى بهدوء لحد ما الإجراء يخلص.

* و بعد ما تقيس وتخلص لازم تشجع الحيوان بلطف وتمدح صبره على التحمل وتحضنه وتكافئه