الفيل 

  ضيف الشرف النهارده هو الفيل هنتكلم عنه وعن معاناته في البراري والصييد من ناحية البشر وهقولكم قصه الفيله ماري 

ممكن يوصل عمر الفيل فى البريه لحوالى 60 سنه

ووزنه بيتراوح بين 2.5 ل 7 طن وطوله ما بين 8.2 ل 13 قدم 

وبالرغم من حجمه الضخم الفيل حيوان نباتى بياكل الجذور والأعشاب والفواكه وحتى لحاء الأشجار وعشان يقدر يحافظ على حجمه الضخم ده بيستهلك يوميًا ما يقرب ل 200 كجم من النباتات و189 لتر من الماء 

الفيل بيمشي مسافات كبيره جدا عشان يلاقى الأكل والمايه اللى تكفيه من شرق القاره لغربها وشمال وجنوب داير يعينى على كعوب رجليه

ولكن فى الحقيقه هو رشيق آخر حاجه وبيمشى على طراطيف صوابعه ولا أجمد بلارينا وده السبب اللى بيخلي الأفيال متقدرش تنط مش حجمهم الضخم مثلا

‏

بالرغم من إنه بيستهلك كميات كبيرة إلا إن وجوده مهم جدا فى النظام البيئي لدرجه إنه بيطلق عليه " مهندس النظام البيئي"

إزاى حضرتك ده كويس إنه مخلصش علي النظام لحد دلوقتي

‏

هقولك بس ركز معايا 

أثناء تجوله فى القاره عشان يلاقى ياكل بيحفر بأنيابه مجارى الأنهار الجافه وبيكون حفر مائيه يقدر يشرب منها وكمان الحيوانات المختلفه

مش بس كده بالرغم من الكميات الكبيره اللى بياكلها إلا إن معدته مبتقدرش تهضم كل شئ والمخلفات بتاعته بتحتوى على بذور النباتات اللى بينشرها على مساحات واسعه أثناء تجوله 

ده حتى الأشجار والشجيرات اللى بيتغذى عليها بتساهم فى عمل ممرات فى الغابات تقدر تمشى فيها الحيوانات الصغيره

‏

نتكلم بقى عن الحياه الأجتماعيه للأفيال 

الأفيال بتعيش فى مجموعات تُسمى القطيع وتقودها الإناث وتُسمى الأبقار  وفى الغالب الأنثى اللى بتقود القطيع بتكون هى الأضخم والأكبر سنا ويشمل القطيع الاطفال

‏

والذكور البالغه اللى بتُسمى الثيران تُفضِل التجول بمفردها وممكن كمان تكون مجموعه أصغر تحتوى على الذكور جميعًا

‏

فتره حمل الأفيال هى الأطول بين الثدييات اللى بتوصل ل 22 شهر يعنى تقريبا سنتين ويصل وزن الفيل عند الولادة ل 200 رطل وطوله ل 3 أقدام 

الفيل بيعيش في قارتين بس على الكوكب هم أفريقيا وآسيا  وموجود منه فصيلتين هم  الأفريقية و الآسيوية 

ولكن في عام 2000 دار جدال بين العلماء إن الفصيله الأفريقيه بتحتوى على نوعين مختلفين ولكن أعترض البعض بسبب إن الاختلافات دى مش كفايه عشان نعتبرهم فصيلتين مختلفتين ولازال البحث جارِ 

خليك معايا كده متوهش منى

طيب دولقتى إزاي أقدر افرق بين الفصيلتين المعترف بيهم  

اقولك امال انا روحت فين

اسهل طريقه هي الأ ُذن ايوا الأُذن  الفيل الأفريقى بيتميز ب أُذن أضخم وشبيهه نوعا ما بشكل قاره أفريقيا شايف الإنتماء وصل لفين على عكس الفيل الآسيوي اللى بيتميز ب أذن أصغر وأكثر استداره 

أُذن الفيل الأفريقى الكبيره دى مش جايه من فراغ ابسليوتلى الفيل بيستخدمها عشان يقدر يتخلص من الحراره الزايده بالإشعاع وده لإرتفاع درجات الحراره فى أفريقيا

ولكن أهم حاجه بيستخدمها عشان يخفف من حرارته هى الخرطوم وده عباره مزيج من الشفاه العلويه و الأنف ، ويحتوى على أكتر من  40000 عضله

بيستخدمه فى الشم و التنفس والشرب وكمان كذراع عشان يمسك بيه الأكل ولحاء الاشجار وحتى الحشائش الصغيره عن طريق الزوائد اللى فى نهايته وكمان ويرش بيه المايه ويستحمى عشان يطرى على نفسه فى الحر

‏

‏ مش بس المايه لا كمان بيرش التراب على جسمه عشان يتخلص من الحراره هيعمل ايه بقى ما لازم يتصرف

‏

ركز معايا بقى فى أهم حته اللى جايه دى كده  

طبعا الفيل الضخم ده صعب يكون له اعداء بس الإنسان مفيش حاجه بتقف فى وشه 

طيب وليه الإنسان يعادي الفيل ما هو زى الفل أهو وفى حاله

اقولك ليه  عشان سنانه تخيل حضرتك حد يكون عايز يتخلص منك عشان سنانك هو حتى مش عايز الطقم كله لا ده عايز الأنياب بس

عشان نعرف ليه الإنسان ليه مش سايب الفيل في حاله مش بس عشان سنانه لا وعقله الكبير كمان اللى بيخليه واحد من أربعه مخلوقات منها الإنسان تقدر تميز نفسها في المرايه

 ايه هو الكنز الملوث الا ممكن يخليك تبقي مليونير 

طيب تعالي احكيلك حكاية العاج الكنز الملوث.. كنز لأنه أغلى من البترول والحصول عليه سهل جدا للأسف 

واه ملوث بدم الفيلة اللي بتتقتل بس علشان الصيادين ياخدوا منها الناب بتاعها ويبيعوه بملايين الدولارات 

مبدئيا كده بس فيه معلومة الناب موجود في ذكور وإناث الفيل الأفريقي لكن موجود في الذكور بس من الفيل الهندي 

نرجع تاني يا صديقي  احتلت تجارة العاج في السوق السوداء المركز الرابع بعد تجارة المخدرات والحشيش والسلاح متخيل ! وبتحتل نفس المركز من حيث الحجم المالي 

بص معايا كده 

كيلو العاج في 2014 كان بيتباع ب 2100$ وعندك وزن النابين في الفيل الواحد بيوصل ل 90 كيلو اضرب كده واحسبها  ورد عليا فالكومنتات مستنياك وشايفة الصدمة علي وشك 

ايه دماغك بتزقزق وهتاجر في العاج ده انت بفيل واحد بس وهتبقي مليونير 

استني بس هكملك باقي القصة . يا صديقي التجارة دي سبب من الاسباب الرئيسية لانقراض الفيل اللي بيتقتل بطريقة وحشية جدا لمجرد استخلاص الناب منه 

‏ انت عارف ان 55 فيل أفريقي بيتقتل يوميا بسبب انيابه يعني حوالي 20 الف فيل يُقتل سنويا  وده حسب بيان رسمي صادر من " الصندوق العالمي للحياة البرية " في 2019 . 

‏حاليا وصل عدد الفيلة في أفريقيا إلي 400 ألف فيل مهدد بالإنقراض  

الموضوع أكبر مني ومنك يا صديقي دول ماڤيا تجارة العاج متحاولش تتورط معاهم بقي والفلوس تغريك 

بيصنعوا ايه من العاج ده طيب ؟ 

يا سيدي بيصنعوا اكسسورات او ينحتوا منه تماثيل او مفاتيح البيانو الفاخرة او كرات البلياردوا من أجل الفشخرة .

مش بس كده دول يا سيدي بيطحنوه ويستخدموه في الطب الشعبي الصيني بيقولك بيعالج قرح المعدة والتهاب المفاصل والصرع .

‏نفوق 275 فيل في بوتساوانا بشكل غامض!! ده عنوان اتصدر الصحف الكام يوم اللي فاتوا يا صديقي ولسه التحقيق شغال ومش قادرين يحددوا سبب لسه وممكن يكون لتجارة العاج يد في الموضوع .

 قصة الفيله ماري 

بص بقي يا سيدي هقولك حاجه 

الإنسان أبشع كائن موجود علي وجه الأرض 

‏اه اسمعني للاخر ومتستعجلش

هحكيلك قصة ليها علاقة بالفيلة ماري وهتحكم بنفسك وده استمرار لكلامنا عن الفيلة والله بيتعذبوا معانا علي مر التاريخ 

مركز طيب ارجع معايا بالزمن لورا.. لا كمان شوية   ايوه سنة 1916

" إعدام الفيلة ماري " 

  ايوه سمعت صح اعدموا فيلة 

طيب اعدموها ليه يا سيدي ؟ ده سؤال مهم وجميل 

تعالي أقولك  : كان فيه مدرب اسمه ريد وهو صغير ومعندوش خبرة في مجال ترويض الحيوانات 

المهم كان شغال في سيرك وبيبقي فيه حدث ترويجي ليوم العرض الأساسي فبيعملوا حاجة كده زي كرنڤال ويمشوا بالحيوانات في الشارع 

الفيلة ماري كانت ضمن الكرنڤال وريد معاه عصاية مدببة  ليها سن يعني  وعمال يضرب في ماري بيها  ومبسوط جدا والناس كمان مبسوطة حلو لحد هنا ؟! 

لا مش حلو ماري متضايقة طبعا من الضرب بالعصاية وكمان مدببة فبتأذيها وحاولت تنبهه وهو مفهمش  وتشجيع الجمهور وحماسهم عماه 

هكملك الحكاية ركز معايا 

ماري وهي ماشية شافت بطيخ  علي جانب الطريق فاتجهت ناحيته علشان تاكل  عمك ريد يسكت؟ لاء

يجيب العصاية ويضربها علي راسها وبكده كتب نهاية حياته بايده 

ماري تروح تكسر جذع شجرة وتضربه علي دماغه يقع ريد ودماغه تنزف بغزاره.. لكن ماري الغضب مسيطر عليها فتكمل عليه وتروح قاعدة فوقه انتقاما منه 

موقف عنيف وفظيع مقدرش يتحمله الناس واتحول الكرنڤال لرعب حقيقي ومحدش قدر يقوم ماري من عليه غير الشرطة وبعض المدربين المحترفين

‏

إحنا كبني آدمين بنحب نتكلم كتير ونشوف الأمور بنظرة سطحية .. طبعا أنت عارف يا صديقي مش هقولك يعني

تندد الجرايد بالحادث ده والناس تحاول تهاجم ماري وتضربها بالرصاص ووصل الأمر لتهديد مدير السرك بعدم تأدية عروضه لو ما أعدمش ماري 

طبعا اضطر يخضع لكلام الناس  وخاصة ان قضية ماري اتحولت لقضية رأي عام وكل الناس كانو ضدها 

وبدأت تظهر اقتراحات وأخد آراء لكيفية الإعدام .

فيه ناس اقترحت تتربط بين قطارين ويتحركوا عكس بعض  تتضرب بالرصاص في دماغها او يستخدموا كهرباء علشان يموتوها

شايف بشاعة الإنسان قولتلك متستعجلش ده حيوان مبيتكلمش والمفروض مش دي الطريقة المناسبة للتعامل معاه حتي لو عمل حدث بشع زي ده إحنا حتي ربنا ميزنا بالعقل عنه 

نرجع تاني لحكايتنا يا سيدي 

وصلوا لايه : ماري تتعدم في ميدان عام .

لا انت سمعت صح ميدان عام 

اللي هو لما بيعدموا حد في ميدان عام علشان يكون عبرة لغيره والناس تتعظ طيب هتعدموا ماري في ميدان عام ليه ؟ علشان باقي الحيوانات تتعظ مثلا !! وميعملوش زيها 

أنت عبيت ؟هل أنت عبيت ؟!!! 

جه اليوم المنتظر آلاف الناس متجمعة وماري بتصعد مع مدير السيرك والمدربين ربما كانت بتعتقد أنها هتأدي عروض للناس زي العادي بتاعها  لكن للأسف الناس دي متجمعة ومتحمسين ومبسوطين ومتظرين إعدامك يا ماري 

يربطوا حبل حوالين رقبتها ويعلقوها في رافعة لكن بسبب وزنها الزايد تتكسر الرافعة ويتكسر لماري كام ضلع بس متموتش ⁦

احضروا رافعة تانية  لكن اللي يزعل بجد ياصديقي ان ماري كانت مستسلمة ومحاولتش تقاوم وعلقوها في الرافعة والمرة دي ماتت ماري وسط تصفيق وهتاف الناس وضحكاتهم مبسوطين ان ماري أعدمت!!!

شوفت بقي كده اكدتلك بشاعة الإنسان !!!

فاكرنا خلصنا قصتنا ولا إيه اصبر معايا هنكمل 

بعد إعدام ماري 

الدنيا فضلت مقلوية واتفتح تحقيق وفحصوا ماري علشان يجدوا جروح عميقة في جسمها بسبب عصاية ريد لحد ما وجدوا جرح غائر وده كان السبب في عصبيتها وقتلها لريد 

‏

وأوضحت التحريات برضو ان ريد كان غير محترف ولا يرقي للتعامل مع الافيال أساسا يعني بعد موت مارى اكتشفوا بشاعة ريد صاحب العقل اللي استفز ماري الكائن اللي مبينطقش ومعندهوش عقل .

خلصت قصتنا وخلصنا مغامرتنا معاكم في متحف الحياة البرية مع الفيل