تخزين اللحوم
رايح فين يا حسن ؟! رايح احط اللحمه في التلاجة زي ما ماما قالت .
جدع يا حسن انت تعرف انك لو سيبت اللحمة نيئة في درجة حرارة المطبخ اكتر من ساعة هتخلي البكتيريا تنشط وتتكاثر علي اللحمة
بس مش معني كدا انك تجيب اللحمة من الجزار علي طول علي الفريزر في شوية حاجات كدا لازم تاخد بالك منها
فيه اخطاء شائعة كتيرة أغلبنا بيعملها لما ييجي يخزن اللحوم منها انه يغسلها قبل ما يحطها في الفريزر او يجمدها ويرجع يفكها وبعدين يجمدها تاني،وكمان ممكن يقطع اللحمة وباقي الخضار علي نفس لوح التقطيع
طبعا كل اللي فات دا غلط جدا وممكن يزود نقل الامراض والبيكتيريا حتي لو اللحمة بتاعتك سليمة
هي اللحمه خطيرة للدرجادي يا دكتور ؟!
لأ مش خطيرة بس لازم نحفظها بطريقة صحيحة ودا انك تنظفها كويس وكمان تشيل الدهون والاوساخ منها.
بس يا دكتور انت قلت مينفعش اغسلها .
ما انت بتزيل اي شوائب فيها بالتقطيع وكمان لازم تحطها ف كيس جاف ومتنفخش فيه وتربط .
مينفعش يكون فيه هوا .
ولازم تغسل ايدك كويس بعد مسك اللحمة وتقطيعها و ابعد اللحمة عن اي اكل تاني عشان قلنا البكتيريا ِعشَارية وبتحب تزور جيرانها
بس يا دكتور اللحمة اللي انا اشتريتها كويسة جدا ومفيهاش بكتيريا او الدبيحة كانت سليمة جدا ومش مريضة خالص هتيجي منين البكتيريا دي
هقولك يا سيدي بس اصبر عليا شوية
العجل (الدبيحة ) بتحتوي بكتيريا كتير في امعاءها (microflora ) بتساعدها في هضم الطعام بشكل طبيعي جدا بس البكتيريا دي ممكن تنتقل لنسيج اللحم خلال الذبح و ازالة الاحشاء
مش بس كدا كمان اللحمة ممكن تلقط اي نوع بكتيريا او جراثيم موجوده علي اسطح غير نظيفة عند الجزار او في المطبخ او حتي من الجو
طب البكتيريا دي ضارة يا دكتور يعني كدا اللحمة مينفعش اكلها؟ متقلقش خالص البكتيريا دي غير ضارةلأنها بتموت بعد الطهي في درجات الحرارة العالية بس لو قطعت السلطة علي نفس لوح تقطيع اللحمة من غير ما يتغسل كويس بالماية والصابون تبقي كدا نقلت البكتيريا دي من اللحمة للخضار
طب انا طلعت اللحمة من الفريزر اهو عشان هنطبخها النهاردة يلا روح هات طبق عشان نسيبها تسيح في درجة حرارة المطبخ
لاااااا انت بتقول ايه انت مش عارف انك كدا بتساعد كل البكتيريا اللي في الجو و في الطبق و المطبخ انها تزيد بسرعة جدا جدا الحل الامثل اننا ننقلها من الفريزر للتلاجة عشان تسيح في درجة حرارة التلاجة 4°
طب انا غيرت رأيي ومش عايز اطبخ لحمة النهاردة وكنت خلاص طلعت اللحمة من الفريزر للتلاجة اعمل ايه هقولك زي ما قالت وزارة الزارعة الامريكية USDA ( طالما تمت إذابة اللحوم في الثلاجة، يصبح من الآمن إعادة تجميدها دون طهي )
طب طبخت اللحمة خلاص واكلت منها واتبقي منها جزء احفظه ازاي لبكرا ؟
مبدأيا كدا يا سيدي طبخت اللحمة يبقي لازم تاكلها علي طول سخنة (يعني في درجة حرارة اعلي من 66°) لان اللحمة لو بردت و بقيت في درجة حرارة الغرفة (لفترة اطول من ساعتين) دا بيكون سبب في نمو البكتيريا عليها تاني
عشان كدا الجزء الباقي ممكن تسيبه يرتاح لمدة ساعة وبعدين يتم تبريده لدرجة 4° في التلاجة عادي جدا و نسخنه تاني قبل الاكل ( لازم نتجنب منطقة الخطر اللي بتكون بين درجة حرارة 60° و 5° )
عشان كدا لو طلبت اوردر فراخ او لحمة وجالك بارد من فترة طويلة يبقي كدا مش كويس