تغذية الخيول
هنتكلم سريعا عن غذاء الخيول
زي ماحنا عارفين ان الخيول من الحيوانات اكلة العشب وكمان الجهاز الهضمي بتاعها بيتكون من معدة واحدة ماتقدرش تستوعب كمية كبيرة من الاكل دفعة واحدة.
-حاجة تانية كمان .. بياكل الحصان حوالي ٢ :٢,٥٪ من وزنه يومياً .
-طب الخيول بتاكل ايه
اول حاجة التبن:
ودا لازم يكون لونه اصفر فاتح ومفيهوش غبار وعفن ولا اعشاب ضارة.
تاني حاجة المركّزات( consentrates):
ودي حبوب صغيرة زي الشوفان والشعير والذرة وبتحتوي علي كمية قليلة جدا من الالياف بس بتزود الجسم بطاقة كبيرة وبرضو لازم ناخد بالنا انها تكون نضيفة ومفيهاش حشرات ولا غبار ولونها فاتح .
تالت حاجة المكملات الغذائية:
ودي بنضيفها لطعام الخيول لو كان بيعاني من نقص في الفيتامينات او البروتينات او المعادن
و من المكملات الغذائية فول الصويا واللفت وعباد الشمس والقطن والكتان والفول السوداني دول من مكملات البروتينات
اما من مكملات المعادن الكالسيوم والفوسفور والملح
ممكن كمان ندي الخيول خضروات زي الجزر بس بكمية محدودة
اخر حاجة وهي الماية
كمية الماية اللي بيحتاجها الحصان يوميا بتعتمد علي درجة الحرارة والرطوبة ومستوي نشاطه .
الحصان السليم بيحتاج من 19-57 لتر يومياً والخيول اللي مابتشربش كمية كافية من الماية بتكون اكتر عرضة للاصابة بالجفاف والمغص .
فيه حبة حاجات كدة لازم ناخد بالنا منها في غذاء الخيول
اول حاجة احنا قولنا ان اكله عشب ، فبديهياً ماينفعش نديله لحوم لان الحصان عنده اسنان وجهاز هضمي متخصصين في اكل وهضم النباتات بس.
برضو من الاطعمة المضرة للحصان النخالة لان قميتها الغذائية قليلة ودا بيزود نسبة الالياف المكونة لنظام الخيل الغذائي.
علف الماشية ودا شديد السمّية علي الخيل لانه بيكون مزود ببعض العقاقير.
الامراض الناتجة من سوء التغذية في الخيول
التلبك المعوي (Intestinal inpaction):
ودا الم فى البطن نتيجة امتلاء الامعاء بالغذاء غير المهضوم.
الاسباب:
1- اكل كمية كبيرة من الغذاء الغنى بالسليلوز لمدة كبيرة واكل كمية كبيرة من الطين والرماض
2- ضعف حركة الامعاء خصوصا فى الخيول اللي عمرها كبير 25 - 30 سنة
3- عدم المضغ الجيد للاكل بالفم نتيجة مشكلة فى الاسنان
4- انسداد في الامعاء نتيجة ابتلاع اجسام غريبة (كمية شعر او حبال) او اصابة شديدة بالديدان.
الاعراض:
1- تبدأ ببطئ بحيث يبدأ الحصان بالنظر للناحية اليمين للبطن ويضرب بقدمه البطن.
2- إمساك و البراز بيخرج بكميات صغيرة و صلبة و شديدة الجفاف.
3- زيادة بسيطة فى درجة الحرارة والتنفس و النبض.
4- بالفحص الشرجى بنلاقي القولون ممتلئ وعلى شكل بالون وعادة بيصحبه امتلاء المثانة وممكن يحصل حصر في البول.
العلاج:
يتشابه مع علاج المغص النفاخي (Flatulent colic) بالإضافة إلى
1-استخدام ملينات زي زيت التربنتين و البرافين.
2-ولازم نفحص براز الحصان و اعطاءه قاتل للديدان كل فترة.
انسداد الامعاء (Intestinal Obestruction or twist)
الاسباب:
-مغص شديد بيدفع الحصان للحركة العنيفة و الانقلاب و الدوران على ظهره فى الارض
-وجود كمية كبيرة من الديدان فى الامعاء الدقيقة ودا ادى لانسدادها.
-اعطاء كمية كبيرة من الكارباكول حقن ودا ادى لزيادة حركة الامعاء و التفافها حول بعضها او انفجارها.
-اكل كمية من اجسام غريبة مثل الرمل او الشعر مما يؤدى الى تحجرها خصوصا فى الامعاء الدقيقة.
الاعراض:
-اعراض مغص مفاجئ او نتيجة مغص نفاخى او تلبك معوى
-العرق الشديد نتيجة التعب و الالم.
-ارتفاع النبض الى حوالى 100- 120 / دقيقة ( الطبيعى 40/ دقيقة).
-انقطاع البراز وبالفحص الشرجى مش هنلاقي اى بقايا براز فى المستقيم.
-عند عمل حقنة شرجية تخرج بسرعة بدون تغيير في الكمية او اللون.
-الام فى البطن عند الفحص من الخارج.
العلاج:
غالبا مفيش علاج و الحيوان بيموت فى خلال 48 ساعة فى حالة الانسداد الكامل اما لو كان الانسداد غير كامل فممكن ان يستمر حتى 7 - 10 ايام
التدخل الجراحى ممكن يبقى حل لو اتلحق في مرحلة مبكرة و لكنها تحتاج امكانيات و تجهيزات عالية .
