الفرق بين اللحم البقري ولحم الحمير
هنتكلم في اول مدونه في سلسلة الفود سيفتي عن موضوع مهم جدا لكل الناس وبيحصل كتير كنوع من انواع الغش التجاري هنتكلم عن ازاي تفرق بين لحم الحمير واللحم البقري.
وعشان متتلخبطوش هنقسم الموضوع بتاعنا لجزئين:
1-معرفة لحم الحمير قبل ما تشتريها وتطبخها
عشان تعرف لحم الحمير قبل ما تشتريها عند الجزار
اول حاجه هنبص عليها لون اللحمه قبل ما تشتريها.. طبعا اللحم البقري اللي كلنا عارفينه بيكون لونه احمر وردي جمييل لكن لحم الحمير بيكون لونه احمر غاامق مايل للزرقه ( لون بشع )
تاني حاجه هنلاحظها هي الدهن في اللحم البقري بيكون لونه اصفر فاااتح جدا وفي اللحم الجاموسي بيكون لونه ابيض ولو فضل في درجة حرارة الغرفة بيتجمد وبيكون كتل.. لكن لحم الحمير الدهن بتاعه بيكون اصفر نحاسي اغمق من الدهن البقري وجيلاتيني وبيفضل بالشكل الهلامي دا مش بيتجمد ف درجة الحراره العادية
طب لو معرفتش افرق بردو يبقي تبص علي عدد الضلوع اللي بتكون 13 ضلع في الابقار لكن لو لاقيتهم 18 ضلع اعرف انه حمار بالتلاتة
هلاقي حد بيقولي طب لو ملاقيتش الا نص الدبيحه او ربعها بس اعمل ايه هقولك بسيطه ممكن تبص ع شكل الضلع نفسه واللي بيكون رفيع جدا ولونها داكن تميل للصدأ مش زي الضلوع البقري اللي بتكون تخينه ولونها احمر وردي يفتح النفس
الناس اللي بتحب الكوارع بقي وبتشتريها دايما اوعوا يتضحك عليكم وتشتروا كوارع حمير اللي بتكون رفيعة جدا وعصوية عكس كاهل الابقار الخلفي اللي بتكون قصيره وتخينه [اشتري التخين دايما]
2-معرفة لحم الحمير بعد ما تتطبخ
طب اشتريت خلاص وشكيت فيها قبل ما تطبخها سخن سكينة واقطع بيها اللحمه لو لاقيت ريحة كريهة زي ريحة الاسطبلات اعرف ان دا حمار بالتلاتة لكن لو لاقيت ريحة لحمه مشوية جميلة يبقي كمل شويها ع الجريل وبالهنا والشفا
اخيرا لو منفعش كل الحاجات اللي قولناها دي هنعملها اختبار مع الشوربة علي رأي عادل امام في فيلم علي باب الوزير🤭 والناس كلها تضحك علي الافية بس احب افاجأكم ان الاختبار دا حقيقي وبيتعمل فعلا في المحاجر بس مش بالفخده كلها طبعا دي بتبقي عينه بسيطه حوالي 250 جرام ويكون فيها كمية من الدهن ونفرمها وبعدين نغليها في الماء كأننا بنعمل شوربة عادي وبناخد جزء من السائل دا (اللي هو الشوربه) ونضيف عليه قطرات من مادة اليود لو ظهر لو ازرق بنفسجي للشوربه تبقي لحمة حمير يا فندم لو مظهرش لون يبقي بقري والحمد لله
نيجي بقي للجزء المهم واللي ممكن نتعرض له كتير اعرف ازاي لحمه الحمير المطبوخه
- اول حاجه فاكر الشوربه.. بيكون علي وجهة شوربة لحم الحمير بقع صفرا كبيره ومش بتتجمد في درجه الحراره العاديه
- وانت بتطبخها هتشم ريحه كريهة جدا زي ريحة اسطبل الخيول عشان كدا في المطاعم الغير موثوق فيها بيزودوا كمية التوابل والبهارات عشان تغطي علي الريحة والطعم ( متاكلش كفتة مليانه بهارات تاني )
- طعمها بقي يا سيدي مسكر لان فيها نسبة كبيره من الجليكوجين اللي هو النشا الحيواني عشان يمد الحمار او الحصان بالطاقة لانه حيوان بيبذل مجهود كبير
- اللحوم المطبوخة للحمير بتكون سودا ( لواحدها مش محمرة يعني )
من الامراض اللي بتسببها لحمه الحمير :
التسمم الغذائي واللي ممكن يوصل إلي الكلي والكبد ويعمل تغير ف الدوره الدمويه ممكن يؤدي إلي الوفاه ،بردو ممكن يؤدي للاصابة بالنزلات المعويه وتكون اعراضها (القئ-الاسهال-الجفاف)بالاضافه الي انهااا وسيله لنقل الدوده الشريطيه بسهوله
EVU_SCU#
Our union is our power